Zô mar 'n preitje Feest bij Co en Jilles
Daer 'ebbe me toch weer d'r-is ouwerwes 'elache en 't môiste was, dat-'t- t'r êlemael iet in zat; want Co en Jilles- daer was 't feest - benne nogal stêf.
Mar non….., mens we bleve gille.
Jilles was vêf en twintig jaer an de zaek, dus bûte de femilie 'a' die ôk mense van zên werrek 'evraegd.
Mêstal wordt tat niks, mar non begon 't gelik al toene-me nog gien gleisje op 'aa'ne.
Mar jae, dà'-ken-je allemael iet zô vertelle, daer mò'-je bij weze.
Ik ken d'r wel wàt van vertelle.
We deeje spelletjies, die van : " Dan 'eb 'k nog 'n meutje, dà'-meutje, dà'-iet Da en as ze is aevens ût gaet, kikt ellek mens t'r nae, .......want zô gaet t'r musje ( en dan maek je 'n raere beweging)…. en zô gaet t'r rokje….
As je dat allemael zô ziet lôpe achter mekander door de kaemers, dan kom je bekant iet mêr bij.
Toen 'a' d'r weer ien verzonne: dieregelui-je nae te doen,
Ien zou tot drie telle en dan allemael tegelik: de ien..... 'n 'ond, de-aare 'n poes, die 'n koe en zô vort.
D'r was ien man, Jan 'iette die, met 'n grôte mond - , je-'oorde d'm ôveral bôve ût - die mos mar 'n 'aen naedoen, vonne we.
Jan zat z'n êge al op te blaeze; 'ij wulde netuurlek bôve iederien ût.
Jilles telde tot drie en non verwachte jûlie netuurlek, dat 't kerèl wier, mar lûster.
Nae 't ien, twie, drie…..'oorde je allien 'êl 'ard……."kukeleku!!!!!!!!"….
We-'aane in mekanders oor 'eflûsterd, datte-we allemael stil zouwe zwêge, be'alleve Jan…., die wis tat iet.
Ken je begrêpe, dà'-we ons bekant ongans 'ebbe 'elache.
Toene me thûs wazze, 'aa'ne we nog ammaar de slappe lach en we wulde iet, dat te bure ons 'oorde, mar we-'aa'ne netuurlek 'n beetje op.
Toe'-we ons stinge ût te klêje, zee-ik teuge die van mên: "Toch is 't 'n goed stel Co en Jilles."
"Dà's waer", zee die, " mar ik zou jouw toch voor gien muljoen wulle misse."
`Nien , ik jouw ôk iet, nog voor gien twie muljoen".
Ik 'a 'me nachpon an en die van mên z'n pyjaema, toe'zee die in iene : "Immie, kom is 'ier".
'IJ stong voor de grôte spiegel, sloog z'n arrem om me 'één en zee: "Zou je non zegge dat íer voor drie muljoen staet……?".
`Non, toe´-'ebbe-me 'elache; ik 'a' d'r pên in me buk van.
O, ik weet non zeker, dat te bure ons ge'oord 'ebbe, mar jae…….
Nadruk verboden Immetje
Geplaatst op 23-08-2008 en 1096 keer gelezen
Like dit 741 Liked