Neel en Engel (gelik 'n dûfje) Zô maer 'n praetje.

Om de paer weke kwamme ze 'n aevend op bezook bij me moeder en me vaeder. Buurvrouw Neel en buurman Engel. 'n lief stel mense, 'n echt paertje in de waere zin des woords; ze 'oorde bij mekander. As ze binne wazze, zee Neel ammaar: " We blêve iet lang 'oor". Buurman Engel gaf me moeder 'n pak en mompelde zô ies van : "'k 'oop dà'-ze te ete benne." Wij, as kindere, wisse wat t'r in dat pak zat…. gedrôgde scharre. Neel 'a' 'n lên 'espanne achter op t'r pleisje en die 'ing mêstal vol mè'-scharre. Mens, wat 'n 'eerlek ete was tat. Met 'n schaer de schar z'n vinne d'r of en de velle netuurlek en dan maer smulle. Neel 'a' op t'r pleisje ôk 'n ofdakje en daer sting 'n grôt en 'n klên peterolie-stel op 'n taefeltje. D'r inge 'n paer pannetjies en 'n vergiet an spikkers an de muur en 'n kookepan in ''n krant onder de taefel. Ôk 'ing d'r 'n êl klên spiegeltje met 'n môi gouwe lêsje. 't was , zô 'ezêd, 'n bijkeuke'tje, êl knus. Neel en Engel wazze allienig maer gezellig; as ze d'r wazze, was 't feest voor ons as kind. Snoop 'a' Neel dan bij d'r, maer soms krege we 'n êle reep sukkelaede, êrst namme de grôte 'n bakje mè'-wat t'r bij en dan 'n gleisje; Engel 'n kruijebitter en Neel 'n citroentje mè'-sukker; daer dee ze de 'êle aevend mee. Ze nam nôit 'n slokje, nien ze roerde de sukker deur de citroen en dan likte ze 't lepeltje of. Ze kos ure kwebbele, maer as Engel zên tebaksdôs op taefel lee en z'n pêp te voorschên 'aelde, dan wier ze stil. Ze bleef onof'ebroke zitte kikke 'oe Engel de tebak in de pêpekop stopte; 'oe die met 'n lucifer de brand t'r in stak en daernae de lucifer dôfde en in 't asbakje op taefel lee, z'n tebasdôs weer in z'n zak dee en 'n flinke rôkwollek deur de kaemer blies. Neel keek ammaar of ze 't voor 't êrst zag 'oe Engel 'n pêp stopte. Dan vroog ze: " Smaekt 't Engel?" Dà'-klonk zô lief, maer jae, 'ij 'iette zô. "Och", zee ze vaek, "Engel is gien man, gelik 'n kenonskôgel,………klets, boem, daer gaet tie, maer gelik 'n dûfje…..fladderie, fladderae…". Non, dà'-von 'k ôk veul mêr bij z'n naem passe. As te pêp ût'eklopt was, zee Neel: "Kom Engel, we gaen naer 'uisje". Engel keek tan naer beneeje om z'n stoel 'één en dan vroog Neel: " Wat zook je?" "Me put", zee Engel. "Rês 's op.,…" zee Neel en jae 'oor, Engel 'a' weer d'êle aevend op z'n put 'ezete, maer dà'-gaf iet, 'ij was toch plat. Dan gonge Neel en Engel naer 'ûs. Twie mense, die non vor bôve de 'onderd zouwe weze, maer iet mêr in deuze wurreld thûs zouwe 'ore. Veuls en veuls te goed. Bêde gelik 'n dûfje…..fladderie…..fladderae…..! Nadruk verboden …………………………………...Immetje
...terug ...home Geplaatst op 08-03-2004 en 959 keer gelezen
Like dit 350 Liked