Zô maer 'n praetje. Gaspenninge'

Somstij gebeurde 't dat 't'r 'n man bij me moeder in de kaemer zat met 'n grôte vierkante lêre tas, of êgelek 'n soortement koffer. Dan 'a' die op taefel allemael klêne brûne pampiertjes en 'ij zat êl vlug te telle. Wat zat tie te telle? Gaspenninge……. 't was de gasmunte-meter-lichter en 'k keek m'ôge ût me 'ôfd, 'oe die man rolletjies maekte van die gaspenninge. Die verdwene dan in die grôte koffer, zô 'ezêd. Maer 't aller leukste was, dà'-me moeder geld berom kreeg, as ze veul gas 'a' 'ebrukt en dat 'a' ze nog-al-d'r-is , want ze 'iel van kokkerelle. As kindere vonne we 't 'n feest as de gasman 'eweest was (Je zee gien gasmunte-meter-lichter). Mên moeder gong, as tie weg was, naer 't 'ookje en dan koch' ze wat lekkers voor 's aevens bij 't bakje en effe gauw naer de slaeger voor 'n stikje 'artig. Toe'k wat grôter wier, moch 'k me moeder 'ellepe deur gaspenninge in de gleuf van de meter te doen; 'k von dat leuk. Je kos met 't ingôie al 'oore of ie vol raekte. Goed oplette of je de penning goed 'iel, want t'r was an de zêkant 'n stikje ût en zôdoende paste 'ie precies in de meter. W'aa'ne ôk 'n lichtmeter; daer mos 'n zullevere gulde in, maer dat liet me moeder mij 'iet doen. Die gaspenninge, die zie 'k nog zô voor me en 'k weet nog precies 'oeveul ze, in mên têd, kostte: Ellef cent per stik. Jae, gaspenninge was geld, 'n êle boel voor kindere, as je die staepeltjies op taefel zag staen. Zô weet ik nog, dà'k op 'n Vrêdagmiddag zat te jengele om 'n klên poppetje, dà'-was maer nege-en-twintig cente. Alle kindere 'aa'ne zô'n poppetje. Ik netuurlek iet en maer krête. Of me moeder non zee : "Kind 'k 'eb 't iet; murrege kom'je vaeder thûs met 't lônzakje, dan is 't Zaeterdagmiddag." " 'Ier", zee ze , "kik maer in me beurs, dan kè'- je 't zien." Wat zag k? Gien geld……?, Toch geld……gaspenninge en 'k wier astrant en zee: "Moe j'eb wel geld, kik maer gaspenninge…." "Dà's gien geld", zee me moeder. Maer 'k was iet van me stik te brenge. "Moe", begon 'k weer, "as 'k t'r drie berom breng naer de winkel, dan 'è-je drie en dorteg cent en 't poppetje is maer nege-en-twintig cent, dan 'è-je nog vier cente over….mag 'k moe?" 't mocht, maer……mè'-niemand over praete. "Nee moe", belôfde ik. Nadruk verboden Immetje
...terug ...home Geplaatst op 07-06-2004 en 1031 keer gelezen
Like dit 700 Liked