Zô mar 'n praetje. Gommelestiek-piepiejasse.

'n mens mot met z'n têd meegaen, dà'-s waer! Maer soms vin 'k toch 'êl moeielek om alles bij te biene. Onderlest 'a' 'k 'n tellefôn-gesprek met te ouste dochter van 'n vrindin van me. Êl leuk wazze we an 't klesse en opiens zee ze: "O, 'k gae je op'ange, want 'k mot naer de sport- en fitness-club; daer gae 'k elleke week 'n ochend naer toe". "Naer wat mò'- je….?", vroog 'k. "Naer de sport- en fitness-club". " Wat doe je daer dan, Krien?", vroog 'k weer. "Benon, geweun oefeninge doen en daernae wor'-je deur 'n meseur onder'ande 'enôme…" "Zô", zee 'k, " en vin'-je man dà'-goed?" "Jae 'oor, die gaet ôk , ien aevend in de week". Êrlek 'ezêd, 'k weet iet wà'k-t'r van zegge mot; dà'-ken 'k geweun iet vollege. Dà'- doe me denke an 'n ver'ael, dat 'n ouwe meut van me vertelde. De schoolwet was in'egaen. Alle kindere mosse dus naer school. Op 'n middag sting ien van de buurjonges op 't pleisje bij z'n moeder raer te doen. Arreme om'ôg,….. arreme omlaeg, rechterbien om'ôg,……linkerbien om'ôg, twie 'ande in z'n zij en zô bleef 'ie maer deurgaen. Z'n moeder zag tat en wier 'n bietje bang; ze riep te buurvrouw d'r bij en die von 't ôk iet plûs. Z'ebbe de jonge binne'erope en 'evraegd, waerom die zô raer dee. " Dà'-lêre we op school, twiemael in de week, dà's gezond voor je spiere; dat 'iet…. gimmestiek", zee die. Onderwêl dat te jonge sting te vertelle, dee de moeder d'r bonte schort of en zette d'r musje recht en 'olde naer de school. An'ebeld en 'evraegd an de mêster of ze deur moch lôpe en dà' moch. Zij naer de gimzael; ze was as 'n furie en daer zag ze 'm. Ze schrêwde: " Lêleke gommelestiek-vent……., wul jij me zeun piepiejasse lêre….?" 'k 'eb nog -al-d'r-is motte lache om dat ver'ael, maer non denk 'k: urreges 'a' ze toch iet êlemael ongelik, nietan? Nadruk verboden Immetje.
...terug ...home Geplaatst op 11-07-2004 en 1053 keer gelezen
Like dit 383 Liked